OER MY
Myn namme is Jeffrey, oprjochter en eigener fan JN Outdoor Sport & Fitness yn Fryslân. Sporten ha ik mei de brijleppel yngetten krigen. Ik bin jong begûn mei fuotbaljen en kickboksen. As oanfolling dêrop bin ik oan'e ein fan myn tsienerjierren ek begûn mei fitness. Fan dat stuit ôf hat fitness my net mear loslitten en begûn ik my dêryn fierder te ûntwikkeljen. Wilens ha ik mear as 25 jier ûnderfining opboud.
Yn 2006 en 2007 ha ik meidien oan de Nederlânske kampioenskippen Natural Fitness. In bysûndere en learsume ûnderfining mei in moai poadiumplak as resultaat.
Ik ha yn sportskoallen wurke as fitness- en groepslesinstrukteur. Ik ha kickbokslessen jûn, trainingsprogramma's fan ClubJoy en ik ha ferskate groepstrainingen ûntwikkele. As personal trainer en coach ha ik minsken begelaat op it mêd fan training, iten en libbensstyl. Nei myn 40e bin ik my ferdjipjen gien yn fysike en mentale fitheid foar 40-plussers en yn taktyske fitnesstraining.
Yn'e perioade dat sportskoallen twongen sletten wurde, is it idee ûntstien om myn eigen bedriuw op te rjochtsjen en outdoor trainingen te jaan. Bûten traine hat tal fan foardielen foar it ûntwikkeljen fan in fit, sterk en fitaal lichem. Mei it oanbieden fan trainingen op lokaasje wol ik foar minsken de drompel ferleegje om yn beweging te kommen.